dr mönsch isch wi dä wo dr zug hett verpasst
u sech d'frag nächär gschteut hett wisoo
u gseet dass si uur äbe hinder isch gange
u dänkt das söu nümme vorchoo
u geit sech für nid no dr näscht zug z'verpasse
e besseri uur ga erschtaa
u won'är drmit uf e baanhof z'rügchunnt
isch dr nächscht zug haut o scho nümm da
das chunnt haut drvoo - dänkt är
dass i nid gründlech dr faarplan ha gläse vorhär
u list ne du gnau bis är gseet dass inzwüsche
grad wieder e zug gfaare wär
jitz bliben'i hie uf em perron
so nimmt är sech vor
de verwütschen'e scho
u blibt der u wartet
da faar ihm dr zug uf em andere perron drvo
so schteit är no geng uf em baanhof dasume
das heisst wenn är nid gschtorbe isch
u wärend är wartet uf d'züg wo ihm absii
geit ihm dr näscht scho dür d'büsch
