ymámipako ñande jaháva’erã kañyhápe
amo taruma’i guýpe ñamopotĩ verapa
jaguapy ha ñaha’ã tikichuéla ku vy’ápe
ñande sýgui kañyhape asajekue oke aja
térã jahami jaike yva reka ka’aguýpe
jaiko jaipo’o ty’ãime apepu ha guavira
nde ao ruguái renyhẽ rerúva’erã torypápe
ha che ku mburukujápe nde áva amboyvotypa
ko’ẽ ha jaikóva’erã mokõive pe kokuerére
oñokuãre kõinguemícha jajuayhu porã asyete
ñanandýpemi jaike ku tape karẽ sa’íre
ha umi kaysã ruguáre ñahendu guyra ñe’ẽ
oĩmévaje ako y upa akóinte iporã hekópe
jaha hague mbyry’áirõ ka’arukue jajahu
pe ýpe jajohypýi, jajuapi yvy ku’ípe
ha upégui ku piro’ýpe pytũmbypávo jaju
ñasãindýrõ pyhare, ñasẽmi pe nde rokáre
kapi’ipe rovyũme ñande ñañombojaru
ha upérõmi ñañandu hakuvy ñane ñe’ãme
kunu’ũ porã apytépe ikyrỹiva mborayhu
ko’ágãramo guarã, che képemante rejúva
che moyrũmívo florencia ndavy’áigui che añoite
upégui ku apáy rire che py’a hory asýva
che mandu’áramo aína ñane mitãrõ guare
