Na caminho di Djabraba
Dja'n saí di und'ê qui'm 'staba
Coraçam batê màs forte
Comâ qui'm 'scapâ di morte
M'encostâ môm na nha rosto
M'sintâ 'mdjongô co gosto
Lua claro pô'm spantâ
M'spia'l m'pô ta cantâ
Ó lua dixâ'm spiabo
Nha cretcheu tambê al stâ odjabo
Andâ na ceu dibagar
Bô lumiâ'm caminho na mar
Palmanhã canto manchê
Qui Djabraba parcê
Parcê'm comâ é céu qui abrí
Pa Nhor'Dés bem arrí co mi
Na terra canto m'pô pé
Fé qui nunca m'perdê
Entâm Nhor'Dés abri'm céu
Na braço di nha cretcheu
Dipós m'dâ Nhor'Dés graça
Pamô el libiâ'm nha disgraça
Pamô el obí'm nha lamento
El cabâ'm co nha sofrimento!
