Spera sempre à megliu stà
Ma u megliu induve hè
E quant’ellu hà da stà custà
D’acquiste un pocu di bè.
Indu e mane è pè u core
Si chere sempre criscenza
Sè un po di bè accorre
Forse sarà una scenza.
Ma po esse ancu un casticu
S’è u core hè in cuntintezza
Sò eiu chì a vi dicu
Ùn circate altra ricchezza.
Prima di l’avè, hè l’esse
Pigliate so chì vi vene
Di sò chi u tempu tesse
Fiori, prunu, gioie è pene.
Fate à megliu pè u male
Per un bè micca timori
Hè una cosa naturale
D’arricoglie I so fiori.
Ma si un mazzulellu basta
Pè raligravvi lu core
Perchè vulè una catasta
Di fiori chì s’anu da more.
